תהלים – פרקים עו-פ

(פרקים עו-פ)יהי רצון קודם אמירת תהלים: יהי רצון מלפניך יי אלהינו ואלהי אבותינו הבוחר בדוד עבדו ובזרעו אחריו והבוחר בשירות ותשבחות, שתפן ברחמים אל קריאת מזמורי תהלים שאקרא...

4 דק' קריאה

מערכת ברסלב ישראל

פורסם בתאריך 25.12.07

יְהִי רָצוֹן קוֹדֵם אֲמִירַת תְּהִלִּים
 
(בְּשַׁבָּת ויו"ט אֵין אוֹמְרִים אוֹתוֹ)
 
יְהִי רָצוֹן מִלְּפָנֶיךָ יְיָ אֱלֹהֵינוּ ואֱלֹהֵי אֲבוֹתֵינוּ הַבּוֹחֵר בְּדָוִד עַבְדוֹ וּבְזַרְעוֹ אַחֲרָיו וְהַבּוֹחֵר בְּשִׁירוֹת וְתִשְׁבָּחוֹת, שֶׁתֵּפֶן בְּרַחֲמִים אֶל קְרִיאַת מִזְמוֹרֵי תְּהִלִּים שֶׁאֶקְרָא כְּאִלּוּ אֲמָרָם דָּוִד הַמֶּלֶךְ עָלָיו הַשָּׁלוֹם בְּעַצְמוֹ זְכוּתוֹ יָגֵן עָלֵינוּ. וְיַעֲמָד לָנוּ זְכוּת פְּסוּקֵי תְּהִלִּים וּזְכוּת תֵּבוֹתֵיהֶם וְאוֹתִיוֹתֵיהֶם וּנְקֻדּוֹתֵיהֶם וְטַעֲמֵיהֶם וְהַשֵּׁמוֹת הַיּוֹצְאִים מֵהֶם מֵרָאשֵׁי תֵּבוֹת וּמִסּוֹפֵי תֵּבוֹת, לְכַפֵּר פְּשָּׁעֵינוּ וַעֲוֹנוֹתֵינוּ וְחַטֹּאתֵינוּ, וּלְזַמֵּר עָרִיצִים וּלְהַכְרִית כָּל הַחוֹחִים וְהַקּוֹצִים הַסּוֹבְבִים אֶת הַשּׁוֹשַׁנָּה הָעֶלְיוֹנָה, וּלְחַבֵּר אֵשֶׁת נְעוּרִים עִם דּוֹדָהּ בְּאַהֲבָה וְאַחֲוָה וְרֵעוּת, וּמִשָּׁם יִמָּשֵׁךְ לָנוּ שֶׁפַע לְנֶפֶשׁ רוּחַ וּנְשָׁמָה לְטַהֲרֵנוּ מֵעֲוֹנוֹתֵינוּ וְלִסְלֹחַ חַטֹּאתֵינוּ וּלְכַפֵּר פְּשָּׁעֵינוּ, כְּמוֹ שֶׁסָלַחְתָּ לְדָוִד שֶׁאָמַר מִזְמוֹרִים אֵלּוּ לְפָנֶיךָ, כְּמוֹ שֶׁנֶּאֱמַר גַּם יְיָ הֶעֱבִיר חַטָּאתְךָ לֹא תָּמוּת. וְאַל תִּקָּחֵנוּ מֵהָעוֹלָם הַזֶּה קֹדֶם זְמַנֵּנוּ עַד מְלֹאת שְנוֹתֵינוּ בָּהֶם שִׁבְעִים שָׁנָה בְּאֹפֶן שֶׁנּוּכַל לְתַקֵּן אֵת אָשֵׁר שִׁחַתְנוּ. וּזְכוּת דָּוִד הַמֶּלֶךְ עָלָיו הַשָּׁלוֹם יָגֵן עָלֵינוּ בַּעֲדֵנוּ שְׁתַּאֲרִיךְ אַפְּךָ עַד שׁוּבֵנוּ אֵלֶיךָ בִּתְשׁוּבָה שְׁלֵמָה לְפָנֶיךָ. וּמֵאוֹצַר מַתְּנַת חִנָּם חֲנָנוֹ, כְּדִּכְתִיב וְחַנּוֹתִי אֶת אֲשֶׁר אָחֹן וְרִחַמְתִּי אֶת אָשֵׁר אֲרַחֵם. וּכְשֵׁם שֶׁאָנוּ אוֹמְרִים לְפָנֶיךָ שִׁירָה בָּעוֹלָם הַזֶּה כָּךְ נִזְכֶּה לוֹמַר לְפָנֶיךָ יְיָ אֱלֹהֵינוּ שִׁיר וּשְׁבָחָה לָעוֹלָם הַבָּא. וְעַל יְדֵי אֲמִירַת תְּהִלִּים תִּתְעוֹרֵר חֲבַצֶּלֶת הַשָּׁרוֹן וְלָשִׁיר בְּקוֹל נָעִים בְּגִילַת וְרַנֵּן, כְּבוֹד הַלְּבָנוֹן נִתָּן לָהּ, הוֹד וְהָדָר בְּבֵית אֱלֹהֵינוּ בִּמְהֵרָה בְּיָמֵינוּ אָמֵן סֶלָה:
 
קוֹדֵם שְׁיַתְחִיל בְּאֲמִירַת תְּהִלִּים יֹאמַר זֶה:
 
לְכוּ נְרַנְּנָה לַיהֹוָה, נָרִיעָה לְצוּר יִשְׁעֵנוּ: נְקַדְּמָה פָּנָיו בְּתוֹדָה, בִּזְמִרוֹת נָרִיעַ לוֹ: כִּי אֵל גָּדוֹל יְהֹוָה, וּמֶלֶךְ גָּדוֹל עַל כָּל אֱלֹהִים:
הֲרֵינִי מְזַמֵּן אֶת פִּי לְהוֹדוֹת וּלְהַלֵּל וּלְשַׁבֵּחַ אֶת בּוֹרְאִי לְשֵׁם יִחוּד קֻדְשָׁא בְּרִיךְ הוּא וּשְׁכִינְתֵּה בִּדְחִילוּ וּרְחִימוּ עַל יְדֵי הַהוּא טָמִיר וְנֶעְלָם בְּשֵׁם כָּל יִשְׂרָאֵל:
 
פרק עו
 
א  לַמְנַצֵּחַ בִּנְגִינֹת;  מִזְמוֹר לְאָסָף שִׁיר.
ב  נוֹדָע בִּיהוּדָה אֱלֹהִים;  בְּיִשְׂרָאֵל, גָּדוֹל שְׁמוֹ.
ג  וַיְהִי בְשָׁלֵם סוּכּוֹ;  וּמְעוֹנָתוֹ בְצִיּוֹן.
ד  שָׁמָּה, שִׁבַּר רִשְׁפֵי-קָשֶׁת;  מָגֵן וְחֶרֶב וּמִלְחָמָה סֶלָה.
ה  נָאוֹר, אַתָּה אַדִּיר, מֵהַרְרֵי-טָרֶף.
ו  אֶשְׁתּוֹלְלוּ, אַבִּירֵי לֵב, נָמוּ שְׁנָתָם;  וְלֹא-מָצְאוּ כָל-אַנְשֵׁי-חַיִל יְדֵיהֶם.
ז  מִגַּעֲרָתְךָ, אֱלֹהֵי יַעֲקֹב;  נִרְדָּם, וְרֶכֶב וָסוּס.
ח  אַתָּה, נוֹרָא אַתָּה, וּמִי-יַעֲמֹד לְפָנֶיךָ, מֵאָז אַפֶּךָ.
ט  מִשָּׁמַיִם, הִשְׁמַעְתָּ דִּין;  אֶרֶץ יָרְאָה וְשָׁקָטָה.
י  בְּקוּם לַמִּשְׁפָּט אֱלֹהִים;  לְהוֹשִׁיעַ כָּל-עַנְוֵי-אֶרֶץ סֶלָה.
יא  כִּי-חֲמַת אָדָם תּוֹדֶךָּ;  שְׁאֵרִית חֵמֹת תַּחְגֹּר.
יב  נִדְרוּ וְשַׁלְּמוּ, לַיהוָה אֱלֹהֵיכֶם, כָּל-סְבִיבָיו;  יֹבִילוּ שַׁי, לַמּוֹרָא.
יג  יִבְצֹר, רוּחַ נְגִידִים;  נוֹרָא, לְמַלְכֵי-אָרֶץ.
 
פרק עז
 
א  לַמְנַצֵּחַ עַל-יְדוּתוּן, לְאָסָף מִזְמוֹר.
ב  קוֹלִי אֶל-אֱלֹהִים וְאֶצְעָקָה;  קוֹלִי אֶל-אֱלֹהִים, וְהַאֲזִין אֵלָי.
ג  בְּיוֹם צָרָתִי, אֲדֹנָי דָּרָשְׁתִּי, יָדִי, לַיְלָה נִגְּרָה, וְלֹא תָפוּג;  מֵאֲנָה הִנָּחֵם נַפְשִׁי.
ד  אֶזְכְּרָה אֱלֹהִים וְאֶהֱמָיָה;  אָשִׂיחָה, וְתִתְעַטֵּף רוּחִי סֶלָה.
ה  אָחַזְתָּ, שְׁמֻרוֹת עֵינָי;  נִפְעַמְתִּי, וְלֹא אֲדַבֵּר.
ו  חִשַּׁבְתִּי יָמִים מִקֶּדֶם;  שְׁנוֹת, עוֹלָמִים.
ז  אֶזְכְּרָה נְגִינָתִי, בַּלָּיְלָה, עִם-לְבָבִי אָשִׂיחָה;  וַיְחַפֵּשׂ רוּחִי.
ח  הַלְעוֹלָמִים, יִזְנַח אֲדֹנָי;  וְלֹא-יֹסִיף לִרְצוֹת עוֹד.
ט  הֶאָפֵס לָנֶצַח חַסְדּוֹ;  גָּמַר אֹמֶר, לְדֹר וָדֹר.
י  הֲשָׁכַח חַנּוֹת אֵל;  אִם-קָפַץ בְּאַף, רַחֲמָיו סֶלָה.
יא  וָאֹמַר, חַלּוֹתִי הִיא;  שְׁנוֹת, יְמִין עֶלְיוֹן.
יב  אֶזְכּוֹר מַעַלְלֵי-יָהּ;  כִּי-אֶזְכְּרָה מִקֶּדֶם פִּלְאֶךָ.
יג  וְהָגִיתִי בְכָל-פָּעֳלֶךָ;  וּבַעֲלִילוֹתֶיךָ אָשִׂיחָה.
יד  אֱלֹהִים, בַּקֹּדֶשׁ דַּרְכֶּךָ;  מִי-אֵל גָּדוֹל, כֵּאלֹהִים.
טו  אַתָּה הָאֵל, עֹשֵׂה פֶלֶא;  הוֹדַעְתָּ בָעַמִּים עֻזֶּךָ.
טז  גָּאַלְתָּ בִּזְרוֹעַ עַמֶּךָ;  בְּנֵי-יַעֲקֹב וְיוֹסֵף סֶלָה.
יז  רָאוּךָ מַּיִם, אֱלֹהִים, רָאוּךָ מַּיִם יָחִילוּ;  אַף, יִרְגְּזוּ תְהֹמוֹת.
יח  זֹרְמוּ מַיִם, עָבוֹת, קוֹל, נָתְנוּ שְׁחָקִים;  אַף-חֲצָצֶיךָ, יִתְהַלָּכוּ.
יט  קוֹל רַעַמְךָ, בַּגַּלְגַּל, הֵאִירוּ בְרָקִים תֵּבֵל;  רָגְזָה וַתִּרְעַשׁ הָאָרֶץ.
כ  בַּיָּם דַּרְכֶּךָ, וּשְׁבִילְךָ, בְּמַיִם רַבִּים;  וְעִקְּבוֹתֶיךָ, לֹא נֹדָעוּ.
כא  נָחִיתָ כַצֹּאן עַמֶּךָ;  בְּיַד-מֹשֶׁה וְאַהֲרֹן.
 
פרק עח
 
א  מַשְׂכִּיל, לְאָסָף: הַאֲזִינָה עַמִּי, תּוֹרָתִי;  הַטּוּ אָזְנְכֶם, לְאִמְרֵי-פִי.
ב  אֶפְתְּחָה בְמָשָׁל פִּי;  אַבִּיעָה חִידוֹת, מִנִּי-קֶדֶם.
ג  אֲשֶׁר שָׁמַעְנוּ, וַנֵּדָעֵם;  וַאֲבוֹתֵינוּ, סִפְּרוּ-לָנוּ.
ד  לֹא נְכַחֵד, מִבְּנֵיהֶם, לְדוֹר אַחֲרוֹן, מְסַפְּרִים תְּהִלּוֹת יְהוָה;  וֶעֱזוּזוֹ וְנִפְלְאֹתָיו, אֲשֶׁר עָשָׂה.
ה  וַיָּקֶם עֵדוּת, בְּיַעֲקֹב, וְתוֹרָה, שָׂם בְּיִשְׂרָאֵל, אֲשֶׁר צִוָּה, אֶת-אֲבוֹתֵינוּ;  לְהוֹדִיעָם, לִבְנֵיהֶם.
ו  לְמַעַן יֵדְעוּ, דּוֹר אַחֲרוֹן, בָּנִים יִוָּלֵדוּ;  יָקֻמוּ, וִיסַפְּרוּ לִבְנֵיהֶם.
ז  וְיָשִׂימוּ בֵאלֹהִים, כִּסְלָם, וְלֹא יִשְׁכְּחוּ, מַעַלְלֵי-אֵל;  וּמִצְו‍ֹתָיו יִנְצֹרוּ.
ח  וְלֹא יִהְיוּ, כַּאֲבוֹתָם, דּוֹר, סוֹרֵר וּמֹרֶה, דּוֹר, לֹא-הֵכִין לִבּוֹ;  וְלֹא-נֶאֶמְנָה אֶת-אֵל רוּחוֹ.
ט  בְּנֵי-אֶפְרַיִם, נוֹשְׁקֵי רוֹמֵי-קָשֶׁת;  הָפְכוּ, בְּיוֹם קְרָב.
י  לֹא שָׁמְרוּ, בְּרִית אֱלֹהִים;  וּבְתוֹרָתוֹ, מֵאֲנוּ לָלֶכֶת.
יא  וַיִּשְׁכְּחוּ עֲלִילוֹתָיו;  וְנִפְלְאוֹתָיו, אֲשֶׁר הֶרְאָם.
יב  נֶגֶד אֲבוֹתָם, עָשָׂה פֶלֶא;  בְּאֶרֶץ מִצְרַיִם שְׂדֵה צֹעַן.
יג  בָּקַע יָם, וַיַּעֲבִירֵם;  וַיַּצֶּב-מַיִם כְּמוֹ-נֵד.
יד  וַיַּנְחֵם בֶּעָנָן יוֹמָם;  וְכָל-הַלַּיְלָה, בְּאוֹר אֵשׁ.
טו  יְבַקַּע צֻרִים, בַּמִּדְבָּר;  וַיַּשְׁקְ, כִּתְהֹמוֹת רַבָּה.
טז  וַיּוֹצִא נוֹזְלִים מִסָּלַע;  וַיּוֹרֶד כַּנְּהָרוֹת מָיִם.
יז  וַיּוֹסִיפוּ עוֹד, לַחֲטֹא-לוֹ;  לַמְרוֹת עֶלְיוֹן, בַּצִּיָּה.
יח  וַיְנַסּוּ-אֵל בִּלְבָבָם;  לִשְׁאָל-אֹכֶל לְנַפְשָׁם.
יט  וַיְדַבְּרוּ, בֵּאלֹהִים, אָמְרוּ, הֲיוּכַל אֵל;  לַעֲרֹךְ שֻׁלְחָן, בַּמִּדְבָּר.
כ  הֵן הִכָּה-צוּר, וַיָּזוּבוּ מַיִם, וּנְחָלִים יִשְׁטֹפוּ, הֲגַם-לֶחֶם, יוּכַל תֵּת;  אִם-יָכִין שְׁאֵר לְעַמּוֹ.
כא  לָכֵן, שָׁמַע יְהוָה, וַיִּתְעַבָּר, וְאֵשׁ, נִשְּׂקָה בְיַעֲקֹב;  וְגַם-אַף, עָלָה בְיִשְׂרָאֵל.
כב  כִּי לֹא הֶאֱמִינוּ, בֵּאלֹהִים;  וְלֹא בָטְחוּ, בִּישׁוּעָתוֹ.
כג  וַיְצַו שְׁחָקִים מִמָּעַל;  וְדַלְתֵי שָׁמַיִם פָּתָח.
כד  וַיַּמְטֵר עֲלֵיהֶם מָן לֶאֱכֹל;  וּדְגַן-שָׁמַיִם, נָתַן לָמוֹ.
כה  לֶחֶם אַבִּירִים, אָכַל אִישׁ;  צֵידָה שָׁלַח לָהֶם לָשֹׂבַע.
כו  יַסַּע קָדִים, בַּשָּׁמָיִם;  וַיְנַהֵג בְּעֻזּוֹ תֵימָן.
כז  וַיַּמְטֵר עֲלֵיהֶם כֶּעָפָר שְׁאֵר;  וּכְחוֹל יַמִּים, עוֹף כָּנָף.
כח  וַיַּפֵּל, בְּקֶרֶב מַחֲנֵהוּ;  סָבִיב, לְמִשְׁכְּנֹתָיו.
כט  וַיֹּאכְלוּ וַיִּשְׂבְּעוּ מְאֹד;  וְתַאֲוָתָם, יָבִא לָהֶם.
ל  לֹא-זָרוּ מִתַּאֲוָתָם;  עוֹד, אָכְלָם בְּפִיהֶם.
לא  וְאַף אֱלֹהִים, עָלָה בָהֶם, וַיַּהֲרֹג, בְּמִשְׁמַנֵּיהֶם;  וּבַחוּרֵי יִשְׂרָאֵל הִכְרִיעַ.
לב  בְּכָל-זֹאת חָטְאוּ-עוֹד;  וְלֹא הֶאֱמִינוּ, בְּנִפְלְאוֹתָיו.
לג  וַיְכַל-בַּהֶבֶל יְמֵיהֶם;  וּשְׁנוֹתָם, בַּבֶּהָלָה.
לד  אִם-הֲרָגָם וּדְרָשׁוּהוּ;  וְשָׁבוּ, וְשִׁחֲרוּ-אֵל.
לה  וַיִּזְכְּרוּ, כִּי-אֱלֹהִים צוּרָם;  וְאֵל עֶלְיוֹן, גֹּאֲלָם.
לו  וַיְפַתּוּהוּ בְּפִיהֶם;  וּבִלְשׁוֹנָם, יְכַזְּבוּ-לוֹ.
לז  וְלִבָּם, לֹא-נָכוֹן עִמּוֹ;  וְלֹא נֶאֶמְנוּ, בִּבְרִיתוֹ.
לח  וְהוּא רַחוּם, יְכַפֵּר עָו‍ֹן, וְלֹא יַשְׁחִית, וְהִרְבָּה, לְהָשִׁיב אַפּוֹ;  וְלֹא-יָעִיר, כָּל-חֲמָתוֹ.
לט  וַיִּזְכֹּר, כִּי-בָשָׂר הֵמָּה;  רוּחַ הוֹלֵךְ, וְלֹא יָשׁוּב.
מ  כַּמָּה, יַמְרוּהוּ בַמִּדְבָּר;  יַעֲצִיבוּהוּ, בִּישִׁימוֹן.
מא  וַיָּשׁוּבוּ וַיְנַסּוּ אֵל;  וּקְדוֹשׁ יִשְׂרָאֵל הִתְווּ.
מב  לֹא-זָכְרוּ אֶת יָדוֹ;  יוֹם, אֲשֶׁר-פָּדָם מִנִּי-צָר.
מג  אֲשֶׁר-שָׂם בְּמִצְרַיִם, אֹתוֹתָיו;  וּמוֹפְתָיו, בִּשְׂדֵה-צֹעַן.
מד  וַיַּהֲפֹךְ לְדָם, יְאֹרֵיהֶם;  וְנֹזְלֵיהֶם, בַּל-יִשְׁתָּיוּן.
מה  יְשַׁלַּח בָּהֶם עָרֹב, וַיֹּאכְלֵם;  וּצְפַרְדֵּעַ, וַתַּשְׁחִיתֵם.
מו  וַיִּתֵּן לֶחָסִיל יְבוּלָם;  וִיגִיעָם, לָאַרְבֶּה.
מז  יַהֲרֹג בַּבָּרָד גַּפְנָם;  וְשִׁקְמוֹתָם, בַּחֲנָמַל.
מח  וַיַּסְגֵּר לַבָּרָד בְּעִירָם;  וּמִקְנֵיהֶם, לָרְשָׁפִים.
מט  יְשַׁלַּח בָּם, חֲרוֹן אַפּוֹ, עֶבְרָה וָזַעַם וְצָרָה;  מִשְׁלַחַת, מַלְאֲכֵי רָעִים.
נ  יְפַלֵּס נָתִיב, לְאַפּוֹ, לֹא-חָשַׂךְ מִמָּוֶת נַפְשָׁם;  וְחַיָּתָם, לַדֶּבֶר הִסְגִּיר.
נא  וַיַּךְ כָּל-בְּכוֹר בְּמִצְרָיִם;  רֵאשִׁית אוֹנִים, בְּאָהֳלֵי-חָם.
נב  וַיַּסַּע כַּצֹּאן עַמּוֹ;  וַיְנַהֲגֵם כַּעֵדֶר, בַּמִּדְבָּר.
נג  וַיַּנְחֵם לָבֶטַח, וְלֹא פָחָדוּ;  וְאֶת-אוֹיְבֵיהֶם, כִּסָּה הַיָּם.
נד  וַיְבִיאֵם, אֶל-גְּבוּל קָדְשׁוֹ;  הַר-זֶה, קָנְתָה יְמִינוֹ.
נה  וַיְגָרֶשׁ מִפְּנֵיהֶם, גּוֹיִם, וַיַּפִּילֵם, בְּחֶבֶל נַחֲלָה;  וַיַּשְׁכֵּן בְּאָהֳלֵיהֶם, שִׁבְטֵי יִשְׂרָאֵל.
נו  וַיְנַסּוּ וַיַּמְרוּ, אֶת-אֱלֹהִים עֶלְיוֹן;  וְעֵדוֹתָיו, לֹא שָׁמָרוּ.
נז  וַיִּסֹּגוּ וַיִּבְגְּדוּ, כַּאֲבוֹתָם;  נֶהְפְּכוּ, כְּקֶשֶׁת רְמִיָּה.
נח  וַיַּכְעִיסוּהוּ בְּבָמוֹתָם;  וּבִפְסִילֵיהֶם, יַקְנִיאוּהוּ.
נט  שָׁמַע אֱלֹהִים, וַיִּתְעַבָּר;  וַיִּמְאַס מְאֹד, בְּיִשְׂרָאֵל.
ס  וַיִּטֹּשׁ, מִשְׁכַּן שִׁלוֹ;  אֹהֶל, שִׁכֵּן בָּאָדָם.
סא  וַיִּתֵּן לַשְּׁבִי עֻזּוֹ;  וְתִפְאַרְתּוֹ בְיַד-צָר.
סב  וַיַּסְגֵּר לַחֶרֶב עַמּוֹ;  וּבְנַחֲלָתוֹ, הִתְעַבָּר.
סג  בַּחוּרָיו אָכְלָה אֵשׁ;  וּבְתוּלֹתָיו, לֹא הוּלָּלוּ.
סד  כֹּהֲנָיו, בַּחֶרֶב נָפָלוּ;  וְאַלְמְנֹתָיו, לֹא תִבְכֶּינָה.
סה  וַיִּקַץ כְּיָשֵׁן, אֲדֹנָי;  כְּגִבּוֹר, מִתְרוֹנֵן מִיָּיִן.
סו  וַיַּךְ-צָרָיו אָחוֹר;  חֶרְפַּת עוֹלָם, נָתַן לָמוֹ.
סז  וַיִּמְאַס, בְּאֹהֶל יוֹסֵף;  וּבְשֵׁבֶט אֶפְרַיִם, לֹא בָחָר.
סח  וַיִּבְחַר, אֶת-שֵׁבֶט יְהוּדָה;  אֶת-הַר צִיּוֹן, אֲשֶׁר אָהֵב.
סט  וַיִּבֶן כְּמוֹ-רָמִים, מִקְדָּשׁוֹ;  כְּאֶרֶץ, יְסָדָהּ לְעוֹלָם.
ע  וַיִּבְחַר, בְּדָוִד עַבְדּוֹ;  וַיִּקָּחֵהוּ, מִמִּכְלְאֹת צֹאן.
עא  מֵאַחַר עָלוֹת, הֱבִיאוֹ, לִרְעוֹת, בְּיַעֲקֹב עַמּוֹ;  וּבְיִשְׂרָאֵל, נַחֲלָתוֹ.
עב  וַיִּרְעֵם, כְּתֹם לְבָבוֹ;  וּבִתְבוּנוֹת כַּפָּיו יַנְחֵם.
 
פרק עט
 
א  מִזְמוֹר, לְאָסָף: אֱלֹהִים, בָּאוּ גוֹיִם בְּנַחֲלָתֶךָ, טִמְּאוּ, אֶת הֵיכַל קָדְשֶׁךָ;  שָׂמוּ אֶת-יְרוּשָׁלִַם לְעִיִּים.
ב  נָתְנוּ, אֶת-נִבְלַת עֲבָדֶיךָ, מַאֲכָל, לְעוֹף הַשָּׁמָיִם;  בְּשַׂר חֲסִידֶיךָ, לְחַיְתוֹ-אָרֶץ.
ג  שָׁפְכוּ דָמָם, כַּמַּיִם, סְבִיבוֹת יְרוּשָׁלִָם, וְאֵין קוֹבֵר.
ד  הָיִינוּ חֶרְפָּה, לִשְׁכֵנֵינוּ;  לַעַג וָקֶלֶס, לִסְבִיבוֹתֵינוּ.
ה  עַד-מָה יְהוָה, תֶּאֱנַף לָנֶצַח;  תִּבְעַר כְּמוֹ-אֵשׁ, קִנְאָתֶךָ.
ו  שְׁפֹךְ חֲמָתְךָ, אֶל-הַגּוֹיִם, אֲשֶׁר לֹא-יְדָעוּךָ, וְעַל מַמְלָכוֹת;  אֲשֶׁר בְּשִׁמְךָ, לֹא קָרָאוּ.
ז  כִּי, אָכַל אֶת-יַעֲקֹב;  וְאֶת-נָוֵהוּ הֵשַׁמּוּ.
ח  אַל תִּזְכָּר-לָנוּ, עֲו‍ֹנֹת רִאשֹׁנִים, מַהֵר, יְקַדְּמוּנוּ רַחֲמֶיךָ;  כִּי דַלּוֹנוּ מְאֹד.
ט  עָזְרֵנוּ, אֱלֹהֵי יִשְׁעֵנוּ, עַל-דְּבַר כְּבוֹד-שְׁמֶךָ;  וְהַצִּילֵנוּ וְכַפֵּר עַל-חַטֹּאתֵינוּ, לְמַעַן שְׁמֶךָ.
י  לָמָּה, יֹאמְרוּ הַגּוֹיִם, אַיֵּה אֱלֹהֵיהֶם, יִוָּדַע בַּגּוֹיִם לְעֵינֵינוּ;  נִקְמַת, דַּם-עֲבָדֶיךָ הַשָּׁפוּךְ.
יא  תָּבוֹא לְפָנֶיךָ, אֶנְקַת אָסִיר, כְּגֹדֶל זְרוֹעֲךָ;  הוֹתֵר, בְּנֵי תְמוּתָה.
יב  וְהָשֵׁב לִשְׁכֵנֵינוּ שִׁבְעָתַיִם, אֶל-חֵיקָם;  חֶרְפָּתָם אֲשֶׁר חֵרְפוּךָ אֲדֹנָי.
יג  וַאֲנַחְנוּ עַמְּךָ, וְצֹאן מַרְעִיתֶךָ, נוֹדֶה לְּךָ, לְעוֹלָם, לְדוֹר וָדֹר;  נְסַפֵּר, תְּהִלָּתֶךָ.
 
פרק פ
 
א  לַמְנַצֵּחַ אֶל-שֹׁשַׁנִּים;  עֵדוּת לְאָסָף מִזְמוֹר.
ב  רֹעֵה יִשְׂרָאֵל, הַאֲזִינָה, נֹהֵג כַּצֹּאן יוֹסֵף;  יֹשֵׁב הַכְּרוּבִים הוֹפִיעָה.
ג  לִפְנֵי אֶפְרַיִם, וּבִנְיָמִן וּמְנַשֶּׁה, עוֹרְרָה אֶת-גְּבוּרָתֶךָ;  וּלְכָה לִישֻׁעָתָה לָּנוּ.
ד  אֱלֹהִים הֲשִׁיבֵנוּ;  וְהָאֵר פָּנֶיךָ, וְנִוָּשֵׁעָה.
ה  יְהוָה אֱלֹהִים צְבָאוֹת;  עַד-מָתַי עָשַׁנְתָּ, בִּתְפִלַּת עַמֶּךָ.
ו  הֶאֱכַלְתָּם, לֶחֶם דִּמְעָה;  וַתַּשְׁקֵמוֹ, בִּדְמָעוֹת שָׁלִישׁ.
ז  תְּשִׂימֵנוּ מָדוֹן, לִשְׁכֵנֵינוּ;  וְאֹיְבֵינוּ, יִלְעֲגוּ-לָמוֹ.
ח  אֱלֹהִים צְבָאוֹת הֲשִׁיבֵנוּ;  וְהָאֵר פָּנֶיךָ, וְנִוָּשֵׁעָה.
ט  גֶּפֶן, מִמִּצְרַיִם תַּסִּיעַ;  תְּגָרֵשׁ גּוֹיִם, וַתִּטָּעֶהָ.
י  פִּנִּיתָ לְפָנֶיהָ;  וַתַּשְׁרֵשׁ שָׁרָשֶׁיהָ, וַתְּמַלֵּא-אָרֶץ.
יא  כָּסּוּ הָרִים צִלָּהּ;  וַעֲנָפֶיהָ, אַרְזֵי-אֵל.
יב  תְּשַׁלַּח קְצִירֶהָ עַד-יָם;  וְאֶל-נָהָר, יוֹנְקוֹתֶיהָ.
יג  לָמָּה, פָּרַצְתָּ גְדֵרֶיהָ;  וְאָרוּהָ, כָּל-עֹבְרֵי דָרֶךְ.
יד  יְכַרְסְמֶנָּה חֲזִיר מִיָּעַר;  וְזִיז שָׂדַי יִרְעֶנָּה.
טו  אֱלֹהִים צְבָאוֹת, שׁוּב נָא, הַבֵּט מִשָּׁמַיִם וּרְאֵה;  וּפְקֹד, גֶּפֶן זֹאת.
טז  וְכַנָּה, אֲשֶׁר-נָטְעָה יְמִינֶךָ;  וְעַל-בֵּן, אִמַּצְתָּה לָּךְ.
יז  שְׂרֻפָה בָאֵשׁ כְּסוּחָה;  מִגַּעֲרַת פָּנֶיךָ יֹאבֵדוּ.
יח  תְּהִי-יָדְךָ, עַל-אִישׁ יְמִינֶךָ;  עַל-בֶּן-אָדָם, אִמַּצְתָּ לָּךְ.
יט  וְלֹא-נָסוֹג מִמֶּךָּ;  תְּחַיֵּנוּ, וּבְשִׁמְךָ נִקְרָא.
כ  יְהוָה אֱלֹהִים צְבָאוֹת הֲשִׁיבֵנוּ;  הָאֵר פָּנֶיךָ, וְנִוָּשֵׁעָה.

כתבו לנו מה דעתכם!

תודה על תגובתך!

התגובה תתפרסם לאחר אישור

של צוות האתר

הוספת תגובה

הכתבה הבאה

(פרקים כא-כה)יהי רצון קודם אמירת תהלים: יהי רצון מלפניך יי אלהינו ואלהי אבותינו הבוחר בדוד עבדו ובזרעו אחריו והבוחר בשירות ותשבחות, שתפן ברחמים אל קריאת מזמורי תהלים שאקרא...